Tá an leibhéal sceite i nDún na nGall á laghdú ag Uisce Éireann

Tá soláthar uisce níos sláine agus níos iontaofa á fháil ag custaiméirí Uisce Éireann i gceantair Chaisleán na Finne agus Lios Cúile in Oirthear Dhún na nGall i ndiaidh oibreacha a rinneadh le déanaí chun 4.3km de phríomhphíobáin uisce a athsholáthar sa cheantar.

Leis na hoibreacha, a rinneadh mar chuid de Chlár náisiúnta Laghdaithe Sceite Uisce Éireann, athsholáthraíodh dhá chuid de phríomhlíonraí uisce a bhí ag dul in aois ag suíomhanna ar an N15 idir Caisleán na Finne agus Lios Cúile agus ar L6224 Hill Head Road, ó acomhal an N15 go dtí taiscumar seirbhíse Chaisleán na Finne.

Mar fhreagra ar rátaí arda sceite ón bpríomhlíonra reatha ag na suíomhanna sin, rinneadh athbhreithniú fairsing ar an líonra faoin gClár Athshlánaithe um Príomhlíonraí Uisce, rud a chuir ar chumas fhoirne Uisce Éireann foinse an sceite a aimsiú agus oibreacha deisiúcháin a phleanáil. Rinne foirne braite sceite suirbhéanna ag baint úsáid as teicneolaíochtaí iomadúla, lena n-áirítear trealamh fuaime, chun na sceití a aimsiú.

Cuireadh tús leis na hoibreacha athsholáthair i samhradh na bliana 2023 agus rinneadh iad i gcéimeanna pleanáilte chun cur isteach ar an sreabhadh tráchta a íoslaghdú agus chun an mhíchaoithiúlacht do chónaitheoirí áitiúla a laghdú. Ba é Farrans Construction a chuir na hoibreacha i gcrích thar ceann Uisce Éireann.

Le hathsholáthar na seanlíonraí iarainn theilgthe, ní hamháin go ndéantar laghdú suntasach ar an méid uisce óil a chailltear faoin talamh, ach feabhsaítear cáilíocht an uisce a sholáthraítear chuig sconnaí na gcustaiméirí le haghaidh úsáid tí.

Trí na hoibreacha sin a dhéanamh, cinnteofar soláthar uisce níos sláine agus níos iontaofa do phobail Chaisleán na Finne agus Lios Cúile agus soláthrófar coigilteas costais fadtéarmach freisin trí oibríochtaí líonra uisce a fheabhsú, rud a laghdóidh an méid deisiúcháin agus cothabhála a theastóidh ar an gcóras amach anseo.

Ghabh Patricia Lowry, Bainisteoir Cláir le hUisce Éireann, buíochas leis na pobail áitiúla as a gcomhoibriú agus na hoibreacha riachtanacha sin á ndéanamh.

“Mar thoradh ar na hoibreacha laghdaithe sceite sin, tá soláthar uisce níos sláine agus níos iontaofa á fháil ag custaiméirí i gCaisleán na Finne agus i Lios Cúile agus sna ceantair máguaird,” arsa Patricia.
“Bhíomar ag cailleadh uisce óil glan luachmhar faoin talamh agus tá uisce luachmhar, mar sin, is toradh iontach é na sceití a dheisiú agus an líonra a fheabhsú.”

Tá tionscadal Chaisleán na Finne-Lios Cúile ina chuid de Chlár Náisiúnta Laghdaithe Sceite Uisce Éireann agus cuideoidh sé leis an bhfóntas a sprioc 2030 a bhaint amach maidir le ráta sceite náisiúnta 25%. Tá an-dul chun cinn déanta ag an bhfoireann Náisiúnta Laghdaithe Sceite ó bhí 2018 ann, nuair ba é 46% an ráta sceite.

Ó 2018, tá os cionn €500 milliún infheistithe ag Uisce Éireann chun nuashonrú a dhéanamh ar an líonra uisce faoi thalamh ar fud na tíre tríd an gClár Náisiúnta um Laghdú Sceite a sholáthar.

Tá €250 milliún sa bhreis á infheistiú ag Uisce Éireann gach bliain go dtí deireadh na bliana 2030 - chun sceitheadh a dheisiú agus píopaí a athsholáthar chun soláthar uisce níos iontaofa a chur ar fáil.